PÅ NORSK:
(Muitaleaddji: Per Holm Varsi)
Dat lea Gávat bajábealde, dáččabeale guovlu maid gohčodit Viđđás ja dakko ásai vuoras bárdni. Das lei lavdnjegoahti doppe dan johkagáttis ja dat lávii luosa bivdit ja rievssahiid bivdit doppe meahcis.
Ja dat kránnját dat eai lean gal nu lahka, dat lei máŋga kilomehtera gaska, dain kránnjáin, mat Suomabealde orro. Ja de jávkkái dat almmái. Ii dat dihtto gostege šat, muhto suova gal oidnet ain muhtomin doppe borgiime, muhto eai dieđe mii dat lea dáhpáhuvvan, go ii oidno šat. De vulge iskat doppe, mii dat lea (geavvan).
Ja dat lei liekkas goahti ja ii leat olmmoš gal vuhtton vázzán daid maŋemuš áiggiid olgun. Ja dat imaštalle mii lea dat, go dá nu lea ja ieš dat ii leat ii gostege. De gullá dat áddjá, dat gii nu orui das ahte – das dat han lea keallir dan lavdnjegoađis ja... De gullo doppe – olmmoš doppe. Dat gulai várrá ahte dal ledje boahtán gallesteaddjit.
Na, dat rabai dan luŋkka, de doppe velohallá, dat gii ássá doppe – gii dál ássá dan goađis.
“Maid bat don leat? Dieppe got don oađát?”
“In eisege! Mun láven, mus dahan gal lea seaŋga dieppe, muhto dál mun in leat eará... Mun lean fillemen.”
“Gean don leat fillemen?”
"Na, ii son olbmuid gal leat fillemen, muhto dan spánskadávdda. Ferte dohko čákŋat vai dat gáddá son lea jápmán juo áigá."
Dat lei hirbmat njoammudávda ja lávejedje olbmot hállát ahte dat boahtá dego mátkkálaš. Dat lei hirbmat njoammudávda dáppe Deanuleagis maid ja olugat jápme dan geažil.