PÅ NORSK:
(Muitaleaddji: Isak Samuel Hætta)
Diet ceakko-bákti, máttabealde biilageainnu, lea Jiehtanasbákti: Das go dološáiggi elle ja vádjoledje jiehtanasat miehtá Sámiid eatnama. Ii leat buorre dadjat, gos sii dán áigge leat. Ii leat goit guhkes áigái gullon oktage oaidnán diekkár stuora jiehtanasa.
De lei muhtomin boares áddjá, dalle go eallit máhtte hupmat. Áddjá sadjigođii niibbi. De boahtá spiidni ja jearrá:
- Maid dieinna niibbiin áiggut bargat?
Áddjá vástida:
- Áiggun spiinni njuovvat.
De spiidni ballái ja ruohtastii. De boahtá bussá spiinni ovddal ja jearrá:
- Gosa dál leat ges jur nu gazzume?
- Spiidni vástida: Boares áddjá áigu njuovvat mu, fertejin báhtarit.
Bussá dadjá:
- Váldde mun nai mielde, dáidá boares áddjá mu nai njuovvat.
- Boađe! dajai spiidni.
Soai ruohtasteigga.
De boahtá guovža sudno ovddal ja jearrá:
- Gosa dál leahppi ruohttame?
- Boares áddjá áigu njuovvat, moai fertiime báhtarit.
- Váldi mu nai mielde, dadjá guovža.
- Boađe! dajaiga duot guovttos.
De sii šadde golmmas, ruhttet buohtalaga.
De boahtá vuoksá sin ovddal ja jearrá:
- Gosa dál lehpet ruohtastan?
- Boares áddjá áigu njuovvat min, mii fertiimet ruohtastit báhtarussii.
- Váldet mu nai mielde, dadjá vuoksá, áddjá dáidá mu nai njuovvat.
- Boađe, čurvejedje dat earát.
De sii šadde njealjis. De boahtá rievssat luoddaguora.
- Ga vag, gosa dál lehpet ruohttame? jearrá rievssat.
Sii vástidit:
- Boares áddjá áigu njuovvat, mii fertiimet báhtarit.
- Ga vag, váldet mu nai mielde, dadjá rievssat.
Ja nu sii šadde viđas. Sii olleje jiehtanasa báikái. Jiehtanas lei ieš mannan vieljaidis viežžat heajaidasas ja lei guođđán čoavdaga uvssa ovdii. Sii manne sisa. Guovža čiehkádii olgouvssa duohkái, vuoksá manai siskkit uvssa duohkái, spiidni čuoččahii ommangáddái, bussá čohkkedii beavddi ala, ja rievssat seaivvui hildu ala ges. De bođii jiehtanas vieljaidisguin. Dat dadjá vieljaidasas olgun:
- Vuordilehket dál dii dás dan botta go mun manan sisa čuovgga cahkkehit. Go jiehtanas rabestii olgouvssa, de álggii guovža speažžut su nu ollu go nagodii. Jiehtanas beasai goitge dan meaddel. De ollii jiehtanas siskkit uvssa rádjái. Doppe álggii vuoksá njuvdit ja doarrut nu ollu go nagodii. Jiehtanas beasai goitge dan meattá. De ollii jiehtanas stohpui, áiggui váldit riššaid beavddis, muhto bussá gaccodišgođii jiehtanasa gieđaid nu johtilit go háhppehii. Jiehtanas manai ommangáddái, galggai beassi viežžat. Doppe riehčugođii spiidni nu ollu go nagodii. De gal jiehtanas viehkalii guovdu láhtti dajadettiin:
- Makkár olbmát dál leat boahtán deike?
Dalle bat rievssat skeaikkádii badjin hildu alde ja dajai:
- Gavag ga vag, "kast hit, kast hit"!
Jiehtanas ballái, ruohtastii olggos ja dajai vieljaidasas:
- Vuoi, vieljažiiddán, de viehkalehket! In astta muitalit ovdal go mii leat ollen viđa dehe guđa váráža duohkái.
Sii ruohtastedje buohkat, ja go olleje viđa guđa váráža duohkái, de jiehtanas muitališgođii vieljaidasas ahte olgouvssa duohken lei rávdi mii cápmii su šleakkainis nu ollu go nagodii. Siskkit uvssa duohken leiges náhkkedeallu, ja dat njuvddi ja norddai su nu ollu go nagodii. Beavddi alde lei skuovvadivodeaddji ja dat čuokkui náluiguin su gieđaid, šadde buot hávvin.
- Geahččet dá, eai go leat gieđain hávit? Ommangáttis lei rumbbuid dearppadeaddji, ja nubbi lei ges boaššus. Dat lei nu stuoris, oaivi olii dáhki vuollái ja dat dajai:
"Ga vag, kast hit ,kast hit!"
- Jus mon ledjen dohko bálkestuvvot, de in livčče šat beassat olggos heakkas, dajai jiehtanas.