Sturla Steinsvik er dagleg leiar i Hustadmarmor AS, Elnesvågen i Fræna - ei bedrift som har 160 tilsette og lagar kalkprodukt til den europeiske papirindustrien. Han er 63 år gammal, skild og har tre barn og eitt barnebarn. Yndlingsbok: "Markens grøde" av Knut Hamsun, ikkje overraskande av ein mann som har levd sitt liv tett innpå dei store bureisingsfelta i Fræna!
Klikk på lydlenkja ovanfor og høyr samtalen med Steinsvik i formiddagssendinga vår 30. mai.
 |
| Foto: May Britt Haukås, NRK |
Friluftsliv
I fritida er det sommar som vinter friluftslivet som er viktig for Sturla Steinsvik. Det han kjenner seg stolt over, er familien sin. Det som provoserer han mest, er autoritære "betrevitarar" utan ansvar. Har han eit førebilete? Ja, Kåre Willoch.
Noreg og verda
Noregs tre største fordelar? Dei naturgitte føresetnadene våre, seier Steinsvik: kysten og havet, vasskrafta og ikkje minst folket! Han ser på oss nordmenn som nyskapande, skikkelege og med evne til å tenkje langsiktig. Men han er redd for at vi ikkje legg nok vekt på utdanning og utvikling av kompetansen vår. Og snart blir mangelen på energiressursar eit problem. Steinsvik meiner vi må sjå på vasskrafta vår på nytt. Å brenne opp gass for å skaffe straum er ei dårleg løysing, og vindmøller skjemmer naturen og er uhorveleg dyre i drift.
Kunnskapsglede og kjerneverdiar
Her på kysten har alle næringar eit enormt tilfang av kunnskap. No er det viktig å føre denne kunnskapen vidare til ungdommen - og det må gjerast på ein måte som gir dei unge glede og begeistring ved å lære! Elles viser undersøkingar at nordmenn set familielivet svært høgt, og dette er kjerneverdiar vi gjerne kan ta med oss ut i verdssamfunnet.
Om hundre år
Sturla Steinsvik ser for seg at vi då har utvikla ei arbeidsdeling på verdsbasis ut ifrå dei naturlege føresetnadene i kvart land. Eit norsk bidrag kan vere sunn mat frå fiske og oppdrett. Han trur på nasjonalstaten og identitetskjensla, men den må koplast med toleranse og respekt for andre.
Tips andre om denne saken
Utskriftsvennlig versjon