- Snart irakisk overgangsregjering

Av Bent J. Tandstad

- Innan midten av mai trur eg vi får sjå konturane av ei irakisk regjering som skal samarbeide med koalisjonen, sa Jay Garner i dag tidleg. Han reknar med at ni ulike irakiske grupper vil vere representert i regjeringa.

Den pensjonerte generalen Jay Garner leier den sivile administrasjonen av Irak. (Reuters-foto)

Den pensjonerte amerikanske generalen har tru på at Ahmed Chalabim, leiaren av Den irakiske nasjonalkongessen, vil delta i overgangsregjeringa. Det vil også representantar for dei to kurdiske gruppene i Nord-Irak og medlemer av ulike islamske grupper.

Ein av regjeringsmedlemene vil truleg bli broren til leiaren Det øvste rådet for islamsk revolusjon i Irak. Garner ynskjker også at den kristne minoriteten i landet får ein representant i overgangsregjeringa.

Mange irakarar er rasande på dei amerikanske styrkane fordi det framleis ikkje er oppretta skikkeleg ro og orden i landet, sjølv om det no er fleire veker sidan regimet til Saddam Hussein vart styrta. Å få på plass ei ordensmakt som kan fungere blir ei av dei første og største utfordringane den nye overgangsregjeringa vil få.