Iraks statsminister Iyad Allawi seier at irakiske styrkar har teke 167 utanlandske opprørarar til fange dei siste dagane.
Av
Bent J. Tandstad
|
Iraks statsminister Iyad Allawi. (Foto: AP/Scanpix) |
Utlendingane var frå Syria, Sudan, Saudi-Arabia og fleire andre land, sa Iyad Allawi på ein pressekonferanse i Bagdad i dag. Han fortalde at dei arresterte, som han sa tilhøyrer terroristgrupper, no blir avhøyrde, og at dei skal stillast for retten etter irakisk lov.
Allawi opplyste at 33 av dei er frå Sudan, 30 er frå Syria, 24 er frå Saudi-Arabia, 21 er egyptarar, 14 er frå Jordan, 11 er irakarar som har fått opplæring i Afghanistan, sju er frå Tunisia, fem frå Jemen, fire palestinarar, fire frå Libya, tre frå Marokko og tre frå Libanon.
Allawi stadfesta også at tre utanlandske statsborgarar som var med i gruppa til opprørsleiaren Abu Musab al Zarkhawi, er drepne av irakiske soldatar. Dei fire var frå Egypt, Jordan, Libanon og Saudi-Arabia.
Jordanaren Abu Musab al-Zarkhawi svor nyleg truskap til Osama bin Laden og terrornettverket Al Qaida. Han er truleg leiar for Al Qaida sine operasjonar i Irak.
|
Abu Musab al-Zarkhawi svor nyleg truskap til Al Qaida-nettverket og Osama bin Laden. (AFP/Scanpix-foto) |
Statsminister Iyad Allawi sa også i dag at stillingskrigen mellom dei irakiske styrkane og opprørarane i byen Falluja har nådd sin siste fase.
- Vi må bruke makt. Eg gjer det med tungt hjarte, men har ikkje noko val, sa statsministeren blant anna.
Det har vore harde kampar i utkanten av Falluja dei siste dagane, og mange skal vere drepne og skadde. (NRK-AFP- Reuters)