Av
Bent J. Tandstad
I eit væpna angrep på Sediya-politistasjonen i den sørlege delen av Bagdad vart 12 politifolk drepne, og seks skadde. Ei gruppe væpna menn storma politistasjonen, og dei skal ha sett fri 51 fangar frå fengselet som ligg i tilknyting til politistasjonen.
Like etterpå kom det melding om at 14 menneske vart drepne i ein eksplosjon som vart utløyst av ei bilbombe i den nordlege delen av Bagdad. 19 menneske vart skadde. Politiet opplyser at det var ein sjølvmordsaksjon. Eksplosjonen gjorde også betydeleg skade på bygningar i bilar i nærleiken.
Angrepet skjedde i bydelen Aadhamiya, som også tidlegare har vore utsett for angrep frå irakiske motstandsgrupper.
Det bur i hovudsak sunnimuslimar i denne bydelen.
Gruppa til Abu Musab al-Zarqawi har via ei side på internett teke på seg skulda for dei blodige angrepa. Zarqawi, som opprinneleg er frå Jordan, blir rekna for å nære band til Osama bin Ladens Al Qaida-nettverk.
I haust sa Zarkawi i ei fråsegn at han svergde truskap til Osama bin Laden og Al Qaida-nettverket.
|
minst 14 omkom i sjølvmordsaksjonen i Bagdad i dag tidleg. (Foto: APTN) |