Heilt sidan Sogndal kom til cupfinalen i 1976, har laget spela jamnt i toppseriane. Gjennom målmedviten rekruttering og trening har laget heilt frå midten av 1970-talet vore leverandør av spelarar både til A-landslaget og ungdomslandslaget på herresida.
Laget driv ei mengd baner og idrettsanlegg, og særleg etter at Sognahallen kom i 1998 har fotball og idrett vorte ein viktig næringsveg i bygda.
Vegen mot toppen
Den første gongen Sogndal-fotballen viste at den hadde retteleg tò i seg, var då laget spela seg til 3. runde i cupen i 1968. I 1972 spela laget seg opp frå 3. til 2. divisjon, men rykte ned att i 1974.
I 1976 rykte laget opp att i 2. divisjon, og med eit mannskap som også var rekruttert frå aktive fotballmiljø kring Dalsfjorden i Sunnfjord, spela Sogndal seg heilt til cupfinalen same året.
Cupfinaleåret 1976
|
Frå cupfinalen 1976. (Foto: NRK) |
På Ullevål tapte Sogndal Noregs-meisterskapet mot Brann med 1-2 - sjå video på denne sida. Sogndal sitt eine mål vart scora av Knut Christansen.
Dei som var med på det legendariske cup-finalelaget var:
Ingvar Stadheim, Johan Johannessen,
Torodd Helle,
Rolf Navarsete, Magdalon Sætre,
Knut Christiansen, kaptein
Svein Bakke, Willy Ljøsne, Leon Hovland, Jon Navarsete og Gunnar Sigmar Håre.
Sogndal mellom elitelaga
S.I.L. spela seg opp i 1. divisjon i 1981, men rykte ned etter sesongen 1982. I åra 1983-1987 låg likevel laget i toppen av 2. divisjon.
I åra frå og med 1988 har Sogndal spela i toppserien 1. divisjon i 1988, 1989 og 1990.
Etter at toppserien vart omdøypt til "tippeligaen"/eliteserien i 1991 og divisjonen under vart 1. divisjon, har Sogndal spela i tippeligaen i 1991, 1992, 1. divisjon 1993, tippeligaen 1994, 1. divisjon 1995 og 1996, tippeligaen i 1997 og 1998, 1. divisjon 1999 og 2000, og tippeligaen 2001, 2002 og 2003.
Landslagsspelarar på rekkje og rad
Landslagsspelarar som har vore fotballspelarar i SIL:
Svein Bakke,
Lasse Opseth,
Frode Grodås,
Jostein Flo,
Håvard Flo,
Tore André Flo og
Eirik Bakke.
Tommy Øren har òg spela på A-landslaget, men kampen vart ikkje registrert som offisiell landskamp.
Av framståande fotballtrenarar som har sin bakgrunn som spelarar i SIL, er
Ingvar Stadheim og
Harald Aabrekk dei mest kjende. Stadheim var m.a. trenar og sjef for det norske landslaget frå 1988-1990. Harald Aabrekk har hatt ansvaret for U21- landslaget og vore assisterande landslagssjef for A-landslaget.
|
Sogndal-supporter på Fosshaugane. (Foto: NRK) |
Den omfattande fotballaktiviteten gjorde at Sogndal IL Fotball vart skipa som ei eiga juridisk eining. Dette allianseidrettslaget har ansvaret for all fotballaktivitet i Sogndal.