- Det å ta mannens etternamn er norske kvinners hijab, meiner Asta B. Håland i kvinnegruppa Ottar.
Ho er oppgitt over alle kvinnene som velger å ta mannen sitt etternamn når dei giftar seg.
Håland sit i landsstyret til Kvinnegruppa Ottar og meiner at tradisjonen med namneskifte er med på å hindre likestilling for kvinner i familien.
Fire av fem skiftar namn
Tradisjonen med å skifte namn er slett ikkje er svekka dei siste 15 åra, og det er kanskje ikkje heilt i tråd med oppfatninga om likestilling i samfunnet elles.
Tal frå Statistisk Sentralbyrå viser nemleg at det framleis er eit mindretal av kvinner som held fast på etternamnet når dei giftar seg.
Tradisjonelt
Ei undersøking frå 2003 blant gifte kvinner mellom 20 og 44 år viser at 46 prosent tok mannen sitt etternamn i tillegg til sitt eige, 34 prosent skifta til berre ektemannen sitt etternamn, medan 20 prosent heldt på sitt eige namn.
Og kvinner i Hedmark og Oppland er enda meir tilbøyelege til å velge tradisjonelt enn det dei er i Oslo.
- Kjærleiksrus?
- Likestillinga slår nok ikkje like sterkt inn på namn som på andre felt, trur namneforskar Ivar Utne ved Universitetet i Bergen.
- Kanskje det er ei slags kjærleiksrus? At dei vil vera eitt med mannen? Kan hende er dette lettare å gå inn på for kvinnene enn for mennene, seier Utne. I likheit med mange andre undrar også han seg over dei tradisjonelle vala som kvinnene gjer.
Tek namnet til mannen
Det gjer ikkje Wivi-Merethe Johannessen i Brumunddal. Ho gifter seg laurdag 7. oktober og har for lengst bestemt seg for å ta etternamnet til mannen, Stein Vidar Hovde.
- Eg gler meg til å bytte namn, eg. Det høyrer liksom med når ein giftar seg. Det er fint å heite det same som familien, dei som betyr mest for meg. Dessutan har eg nå eit veldig langt namn, seier ho.
- Dessutan er det eit personleg val; eg har ikkje lyst til å bringe slektsnamnet mitt vidare. Og Hovde er eit fint namn, synest eg, seier Wivi som har to barn i lag med mannen sin – og dei heiter også Hovde til etternamn.
Godtek ikkje namneskifte
Asta Håland i kvinnegruppa Ottar er tydeleg på kva som hadde skjedd dersom dotter hennar kom heim og sa at ho skulle gifte seg og skifte ettenamn:
- Då hadde det blitt bråk. Eg trur ikkje det er nokon fare for at det skal skje, men det hadde blitt bråk.
Denne saken blir diskutert på ØstnyttMagasinet på NRK 1 torsdag klokka 18.40.