Tysdag fekk elevane i 7. klasse ved Langevåg skule i Sula spesielt besøk i musikktimen. Robert Øien Fylling gjekk på Langevåg skule sjølv når han var yngre. No er han blitt stjerne og er meir kjend som Robert Post.
Elevane i 7. klasse ved Langevåg skule i Sula har jobba med eit spesielt prosjekt. Dei er delt inn i grupper som har valt kvar sin yndlingsmusikar dei skal skrive om.
Sjølvsagt valde eine gruppa Langevåg si nyaste store stjerne, Robert Post, som for tida gjer furore på hitlistene både i England og her heime. Tysdag kom han på besøk i musikktimen!
– Gøy å vere popstjerne
Elevane hadde førebudd seg og laga spørsmål dei skulle stille til helten når han kom, og plutseleg stod han der. Robert Post smilte og svarte så godt han kunne. Mellom anna fortalde han at han truleg har spelt 500-600 konsertar og at han har skrive mellom 200 og 300 songar som han har tatt vare på og kan spele.
 |
| – Ja, det er gøy å vere popstjerne. (Foto: Kjell Jøran Hansen) |
Eitt av spørsmåla var om det er gøy å vere popstjerne.
– Ja, det er veldig gøy å få drive på med det som ein likar best, men eg har ikkje fått føle så veldig popstjernetilveret enno, svarte Post.
– Gode spørsmål
Han fekk likevel prøve det litt då han skreiv autografar etterpå. Han syntest han fekk mange gode spørsmål frå elevane.
 |
| Robert Post skreiv autografar til elevane. (Foto: Kjell Jøran Hansen) |
– Det var mange spennande spørsmål som eg vanlegvis ikkje får frå journalistar, og det kan vere litt kjekt det også, sa Robert Post.
Det store høgdepunktet var då Post på sparket spelte slageren sin, "Got None", for elevane.
Høyr og sjå kva som skjedde!
 |
| Høgdepunktet på besøket var då Robert Post song slageren sin "Got None" for elevane.(Foto: Kjell Jøran Hansen) |
Tips andre om denne saken
Utskriftsvennlig versjon