Telegraf og telefon i Hyllestad

I 1866 vart det bygt telegrafline frå Postvåg ved Fensfjorden i Gulen til Rutledal ved Sognefjorden. Derfrå vart det lagt sjøkabel over Sognefjorden til Nesje og vidare til Leirvik. Frå Leirvik fylgde telegraflina same trase som Den Trondhjemske Postvei (sjå Den Trondhjemske Postvei i Gaular) til Førde, slik telefonlina gjorde seinare.

Fiskeritelegraf

Tanken var å byggje telegraflina vidare til Ålesund, men den stoppa i Førde. Her vart det strekt telegrafline til Florø, slik at "fiskeritelegrafen" mellom Florø og fiskeværa omkring fekk samband til landsnettet. (Sjå Fiskeritelegrafen varsla sild.) I 1869 vart det bygt telegrafline sørover frå Ålesund som knytta til Måløy og Kalvåg.

Telefon

Leirvik fekk rikstelefon i 1904 samstundes med Dalsøyra, Eivindvik og Leversund i Gulen. Automatisert i 1971.

Skor fekk rikstelefon i 1905. Stasjonen vart lagt ned i 1964 og abonnentane knytte til Åfjordalen automatsentral.

Løland fekk telefon i 1907 med linje til Lavik.

Sørbøvåg fekk rikstelefon i 1914.

Hyllestad fekk rikstelefon i 1914. Automatisert i 1973.

Lifjorden fekk telefonsamband i 1914.

Skifjorden fekk rikstelefon truleg i 1916.

Storakersundet fekk telefonsamband i 1924.

Hyllestad var saman med Gulen kommune dei siste kommunane i fylket som fekk automattelefon over alt: Først i 1984 var telefonen i kommunen fullautomatisert.

Teksttelefonen

vart starta ved Leirvik stasjon i 1986 og gav arbeid til 20 personar. Som ein kompensasjon for nedleggjing av manuelle sentralar, fekk Leirvik i 1986 ein av tre slike stasjonar i Noreg. I 2006 vart mannskapet halvert fordi det vart mindre etterspurnad etter slike teletenester.