- EU blir bra for oss

SE OGSÅ:

Seier ja for borna si skuld   - For mykje EU-mas   Litauen veldig klar for EU

Av Bent J. Tandstad, Vilnius, Litauen

Dei sju klassekameratane Simonas, Danielus, Jonas, Andrus, Dovydas, Andrius og Darus er 13 og 14 år gamle og enstusiastiske EU-tilhengjarar. Dei er elevar ved Vilniaus Salomejos Neries Gimnazija, ein skule med elevar frå 12 til 18 år. Det er altså ein kombinert ungdomsskule og vidaregåande skule.

Bak frå venstre Danielus Kormilcevas, Jonas Eykas, Simonas Racinas. I midten Andrius Vutanras Serapinas, og framme Andrius Michejevas og Darius Vilkevicius. (Foto: Bent Tandstad/NRK)

Dei unge skuleelevane er ikkje i tvil om at EU vil bety mykje for Litauen. Dei kan fortelje at dei har laga prosjekt om EU på skulen, og at både elevar og lærarar er prega av at landet no skal inn i den europeiske unionen.

- Også negative sider

Simonas Racinas fortel at dei også har studert negative sider med EU, og at dei er fullt klar over at dei finnest. Som at det kan følgje eit enormt byråkrati med, at avgjerder som tidlegare vart tekne lokalt no kan bli tekne andre stader. Men summen er positiv, seier han, og får full støtte frå klassekameratane.

Desse seks klassekameratane frå Vilnius er typiske eksempel på den nye generasjonen litauarar, dei som vart fødde etter at landet igjen vart sjølvstendig. Dei kjenner ikkje kommunismen frå anna enn det dei har lært på skulen og det foreldre og eldre syskjen kanskje har fortalt.

Høg disiplin

Skuleverket i Litauen blir rekna for å halde eit svært høgt nivå. Det var også tilfelle i Sovjet-tida. Elevane må arbeide hardt, og det korte møtet vi hadde med elevane viste også at disiplinen nok er betre enn ved norske skular. Når læraren gir ordre om oppstilling til bilete, så er dei på plass i løpet av kort tid.

Dei ler godt når læraren fortel at journalisten er frå Noreg, og at nordmennene ikkje vil vere med i EU, same kor gjerne EU vil ha dei med. Etterpå kjem fleire av dei bort til meg og spør på sin stotrande engelsk om dette er sant. Det må eg vedgå, men forsikrar dei om at vi har det bra likevel.